Ette tulli Jakob Hak ja kaibas, et tema lats om saanu sandis tettus kohtumees Tannil Pild läbbi, sest se om sis, kui tema mitte kohtun es ole sääl käünu, ja teda ei ole mitte sis kodu kutsutu. Seda teedwa tema esa ja ema, kuis se lats om terwiselda saanu ja tema nõud selle latse kaswatamise ja ülespidamise raha ega aasta 150 Rbl. Temal om ka tohtri täht oma poja läbbi. Tohtri Täht om: Saab tunnistedus, et Kusta Hakkil waiwaja tõbbi om.

Rawwanurmen 7.Sept. 1886 Mühlenthal. Wo.k.t.

Kohtumees Tannil Pilt wastud kaibuse pääle, et tema lännu piiri seletamise perrast Jakob Hakk maija pääkohtumehe käsu pääle, sest et seda piirimitte kohtu ette tuwwa es saa ja se olli jo kolmas kõrd käwwa, sest katte kõrra käümise pääle es saa se asi mitte seletedus.Edimane kõrd olnu Jakob Hakk esi kotton ja sis es sa selletust, päälegi ülnu Jakob Hakk kui sa weel sija tuled, sis saagu minust wang, ent sinust peab kääbas (koolja) saama. Selle asja man omma tunnistaja Johan ja Michel Tuwwi ja Peter Temo.

Kui tema tõist kõrd lännu , sis es näe tema mitte Jakob Hakk kotton ja Tuwwi karri sai sis läbbi loetus.

Kolmas kõrd lännu tema sinna ja tahtnu ka kaardi perra piiri seleta ja tema küsinu kos peremees om ja Tannil ja Mai Hak üttelnu, et nema omma siin peremees ja perenaine, et poig ei puttugi sija, ja tema kohtumees Pild üttelnu, et karjal laske nii kawwa käwwe kui seda asja kohus seletab, ja sis üttelnu Tannil ja Mai Hak, et seda ei sa keegi näggema, kui Johann tuwwi kaswõi säält läbbi käüb, ja sis lännu Mai Hak tarrest wälja ja öelnu, et poig om temale üttelnu, et elaja ei wõi mitte säält läbbi lastus saada ja tarren sõimanu Mai hak jo teda, et kuis sa häbbemata Krants tihkadgi sija tulla, kas sinno sija om käsknu.

Kui tema (T.Pilt) sis tarrest Tannil Hakkiga wälja lännu, sis olnu jo Mai Hak sääl karja tee pääl een ja tema kõnelnu Tannil Hakkiga ja se lubbanu ka weel toll päiwal säält karjal minna, Tannil Hak õelnu ka oma naise mai Hakkile, et lase karri mõtsa minna, ent Mai Hakkil olnu puu käen, ja ise ülnu, et tema ei lase, se olnu poole päiwa aigu kel 12 ja karri Johhan Tuwwil olnu weel hommikust jakko kotton. Pääle selle wõtnu Tannil Hak oma naise olga pitten ja wedanu eest ära, et kül Mai Hak temale ka puuga löönu ja sellel ajal lännu ka Johann Tuwwi kari mööda, ja kui Mai Hak Tannil Hakki käest wallale saanu, nakkanu tema ka sõimanu ja lööKuinu Peter Temole selle malgaga, mis tal käen olli.

Kui tema kohtumees sis üttelnu wanaema, ära nakka taplema, et sa lased henda kinni panda, sis nakkanu Mai Hak temal takkan tulema ja tema üttelnu, et Temo ära lase sel mitte mull takkan tulla, ent Peter Temo ülnu, et sina oled kohtumees ja lased minu ära tappa. Sis, kui tema nämmu et Mai Hak taplema nakkanu, sis hõiganu tema Johan Kukke ja tema poisile, et tulge appi ja wõtke ka kobla ütten, sest temal muud es ole wõtta ja kui ne nakkanu tulema, sis päsnu Mai Hak wallale ja löönu temale edimalt jalaga ja perrast wõtnu tokki maast ja löönu sellega ka, ja sis käsknu tema Mai hak kinni köüta ja kandori manu tuwwa, nii kui temale pääkohtumees olli käsknu. Kui mai Hakk olli kinni köüdetu, sis saisnu Jakob Hak lats sendse wäreti pääl ja Tannil Hak toonu se latse Mai Hakkile tema (kohtumehe) keeldu wasta üska ja se lats nakkanu tänni. Sis üttelnu Johan Kuk ja Peter Temo "Kohtumees kurat, wõtta se lats ära, sest tema pitsitas se latse ära" ja tema käsknu tannil hakkil seda last ära wõta ent se es wõtta ja nee käsknu temal wõtta ja kui kiudu mees tulnu wõttiwa Johan Kuk Mai Hak põlwe wallale ja peter tEmo wõtnu käe wallale sis wõtnu tema se latse ja andnu Tannil Hak kätte ja sis wõtnu selle käest Jakob Hak naine oma latse ära. Selle asja man omma tunnistaja Peter Temo, Johan Kuk, Jakob Kolder ja Karl Tuwwi.

Ja selle asja man et sel latsel jo sündimisest saani waiwaja tõbbi olli om Tunnistaja Mai Pilt ja Mari Talmar.

Tunnistaja Peter Temo tulli ette ja üttel wälja, et teda om Tannil Pilt kohtumees Jakob Hak poole kutsnu ja sääl kisknu Tannil Hak oma naise Mai Hak säält karjatee päält ära, ent kui Mai Hak Tannil Hak käest wallale saanu, nakkanu Mai Hak teda wäega roppuste sõimama ja löönu teda ütte keppiga ja löönu ka kohtumeest jalga ja sõimanu, et sa häbbemada penni tuled minno sija kõütma sis käsknu kohtumees Mai Hakki kinni kõüta, kui Mai Hak jo Johan Kukke ka löönu oli ja tema sai ka kinni kõüdetus.

Mai Hak kutsnu Tannil Hak läbbi oma poja latse henda kätte ja Johan Kuk kisknu põlwe wallale ja Karl Tuwwi ja tema wõtnu käe wallale ja kohtumees Tannil Pilt wõt se latse Mai Hak käest ärra ja andnu Tannil Hakki kätte ja siis sai Mai Hak kandori mano ära toodus.

Tunnistaja Johann Tuwwi üttel wälja ja tunnist, et tema lännu kohtumees Tannil Pilt ga sinna ja tahtnu karja läbi säält aija ent Mai ja Tannil Hak olnu sääl een ja sis kisknu Tannil Hak oma naise Mai Hak säält eest ära ja sis lännu kari mööda. Pääle selle lännu Mai Hak Peter Temo manu ja sõimanu "sina hoorapäälik ja walla tütrikutallaja" ja löönu Peter Temole ütte tokkiga, sis käsknu kohtumees Mai Hak  kinni köüta ja sis löönu Mai Hak ka Tannil Pildile ja saanu tema ka kinni  köüdetus, ehk kül tema wäega wasta tapelnu, sis toonu Tannil Hak temale latse üska ja selle wõtnu tema jalgu wahele ja säält wõtnu Johann Kuk Mai Hak põlwe wallale, Peter Temo ja Karl Tuwwi wõtnu käe wallale ja Tannil Pilt wõt latse üsast ära ja andnu Tannil Hakk  kätte ja tema toonu kohtumehe käsu pääle Mai Hak oma hobbesega kondori manu.

Tunnistaja Karl Tuwwi üttel wälja, et Mai Hak es lase karjal sält läbbi minna, olnu sääl tokkiga een ja Tannil Hak tõmmanu tema eest ära. Ja kui Mai Hak wallale saanu, löönu tema Peter Temole ja köütmise man löönu Tannil Pildile jalaga munne pääle ja witsa ja koblaga pääle, ja köütmise alustusel wõtnu tema Tannil Hak käest latse, et tema ei lasee henda köüta, ja Johan Kuk wõtnu Mai Hak põlwe wallale Peter Temo ja tema wõtnu käe wallale ja kohtumees Pilt wõtnu nida latse wallale ja andnu Tannil Hak kätte sis saanu Mai Hak kinni köüdetus ja tema weli Johann Tuwwi toonu tema kondori manu.

Tunnistaja Johan Kukk ütles wälja, et tema tulnu kohtumehe käsu pääle sinna ja tema nännu, et Mai Hak löönu egale üttele kes ligi olnu ja tema saanu ka sest löömisest osa sest niisama ka saanu kohtumees jalaga munne pääle ja ka se nuijaga. Pääle selle saanu mai Tuwwi kinni köüdetus ja latse käest kiskumise man, wõtnu tema Mai Hakki põlwe walla ja muide abbiga saanu se lats wallale mis Tannil Hak Mai Hakkile üska tõi. Johann Tuwwi tõi Mai Hak omma hobbesega kandori manu.

Johann Tuwwi üttel weel, et jakob Hak üttelnu temale, et minust saagu küll wang, ent sinust peab kääbas saama.

Peter Temo ütles, et Tannil Hak ähwärdanu weel, et "kül Teije kõik sest tunnet " muud tema ei tija.

Tannil Hak ja Mai Haki se kogokonna kohus Jakob Hakkile tunnistajas ei wõtta, sest ne omma Jakob Hakki wanemba.

Otsus: Michel Tuwwi, Jakob Kalder, Mai Pilt ja Mari Talmar tõises kohtupäiwas ette kutsu.

Pääkohtumees K. Lõhmus

Kohtumees Karl Grünthal

Kohtumees Jaan OpparXXX

Kirj.asemel /allkiri/