Ette tulli Jaan Peterson nink kaibas et Peter Präts tedda ollew karakotti wargas sõimano, nink nõudis selle eest 150 Rubla.

Ette kutsuti Peter Präts nink temma ütles nid: nema tulnowa Jaan Petersoniga Loosi Maggassi mant, nink Salusse kõrtsi mant tulno Peterson een ärra nink temma tulno ka õkwa perra ent ei olle enne järgi sano kui Hindoalla weski lähhikessen sis saisno Peterson tee päält kõrwa puhmo sisse nink temma kutsno säält wälja ent Peterson ei olle tulno, nink temma sõitno Hindoalla weski päle nink Peterson tulno ½tunni perrast koddo nink tema kaeno läbbi akna kui Peterson temma Ree päält kotti tõstno nink sis weel sisse tulno nink temma üttelno misperrast sinna minno paggesid, sinna puhmo sisse ent Peterson üttelno et temma ei ollew olno, nink nemma tahtno wimate sinna kaema minna ent kui wälja tulno nink hobbese ümbre käändno sis löüdno et karakot kos 6 karuist kaaro sissen, olno ärra kaddono nink temma küssino, Peterson kos sinna minno karakotti ollet pandno, anna tedda mulle kätte, nink Peterson pahhano ärra nink üttelno, kas minna sinno karakotti warras olle, nink wimate länno temma ärra koddo.

Ent Jaan Peterson ütles temma tulno kül kõrdsi mant enne ärra nink länno wannamõisade sest et olno sääl tarwis minna, nink sis tulno säält koddo Hindoalla weski päle sis olno Peter Prätsi hobbene Weski läwwe een nink temma arwano et üts weskilinne om nink kaes mes kotti täl pääl olno, nink wimate lännosisse sis löüdno et Präts sääl olno, nink Präts üttelno mes sinna minnost paggesit sinna puhmo sisse ent temma üttelno henda mitte ollew, nink wimate omma nemma tahtno neid jälgi kaema minna, nink tulno wälja, ja sis om Präts üttelno Peterson sinna ollet minno karakotti ärra wõtno anna tedda kätte tollepäle pahhano timma ärra nink üttelno kuddas wõit sinna minno wargas tette nink wimate länno ärra tarre, sis tulno Präts nink üttelno anna minno karakot kätte ent temma wõtno süddame täwwega kirwe nink wiskano ahjo wasta sis om temma emmand nakkano mollembid keelma nink Prätsi pallema et temma ärra lääsi nink Prats om länno wälja nink tulno weiti aja perrast jälle taggasi, nink ütteno sinna karakotti warras anna minno kot kätte ent tema emmand pandno usse takkast kinni nink ei olle laskno sisse sis wimate om weel Prääts üts kõrd usse manno tulno nink sis om temma käsno wahhi temma ni kawwa kui homminguni sis lassep kiik läbbi otsi.

Jaan Weissberg Petersoni sullane tunnistas, et Peter Präts ollew sinna tulno, nink Peterson tük aiga perran tulno nink wimate om Präts Petersoni käest nõudno karakotti nink 6.. karo, nink üttelno anna kätte sinna ollet ärra warrastano, ent Peterson pahhano wäega ärra nink wõtno kirwe ja wissano ahjo wasta nink sis omma nema nakkano Prätsi ärra ajama nink Petersoni emmand om Petersoni keelma nakkano nink kirwe ahjo wisano nink wimate om Präts wälja länno, nink nemma pandno usse takkast kinni, sis om Präts tulno usse manno nink nõudno jälle ja sõimano Petersoni karakotti wargas, (ent nemma ei olle ennamb sisse laskno) nink weiti aja perrast om Präts kolmas kõrd tulno usse manno nink sõimano Petersoni wargas ent Peterson üttelno kos jäije kirwe ma tahha kaeda kas temma lähhap ärra, nink sis länno Prats ärra.

Jaan Mema Hanja wallast tunnistas et temma tulno sel sammal õddangul nink länno kõrdsimanno, nink Hindoallast möda minnen tulno Peterson tälle wasta, nink temma küssino paljo peas kel ollema ent Peterson üttelno wist om kella 10ne aig, nink tük maad eddesi sis om temma te ärre päält löünu üts kot kos karo ka om sissen olno.

Kohtomõistus: Kunna nüüd Peter Präts om Jaan Petersoni wargas sõimano nink sellepäle üttegi selget tunnistust ei olle, nink Hindoalla weski pääl lärmitseno, mõista meije et Peter Präts peap masma 3 Rbl. trahwi walla waeste ladikude (katte nädali aja sissen ärra massa).

Se kohtomõistus sai kohtonkäüjile kulutedus nink §773 ja 774. Tal.säd.ram. 1860.a. ärra selletedus, mes oppust andwa suremba kohtonkäümissest, ent kohtonkäüja es olle sellega rahhul nink wimate saije neile ka §881. perra se trükkito oppusse leht wälja antus.

Päkohtomees Jürri Waldmann

Kohtomees Tannil Oinas

Kohtomees Tannil Purge

Kirjotaja /allkiri/

Copia wälja kirjutet Keisrl. VI Kih. kohto