Kohto ette tulli mõisa walitseja S. Rõigas ja kaibas, et Hindrik Ajo ollew kewäja paklid liina wiinu, kuna temä Ajole üttelnu ka et sa mitte mõnd kolgand linno paklide sisse ei jätta kui sääl ka mõni peas olema, selleperast et hulga rabajide man iks mõni kolga luije sisse jääs. Hindrik Ajo aga ei ollew mitte linno wälja otsnu, waid liinan näidanu perisherräle, et linno pakkalde sisen olnu ja ütelnu: Pakla omma kõik linno täis ja kui kõik pakla peas läbi otsitama, sis saap säält mõni 10 Leisikut linno. S. Rõigas arwab, et H. Ajo esi tedä kiusata tahtnu ja selleperast linno pakkalde sisse pandnu. Pallep kog. kohut seda asja üle kullelda ja süüdlast sääduslikult trahwi.

Hindrik Ajo kutsuti kohto ette ja kui temäle kaibdus ette loeti, sis wastutas seesama, et linno olnu kül paklide sisen ja ollew mõisawalitseja esi man olnu kui pakla koorma pääle pantu, ei ollew ka mitte temäl käsknu pakalde sisest linno wälja korjata. Temä ei ollew herräle üttegi linna näüdanu, ei ollew ka üttelnu, et 10 leisikut linno pakkalde sisen om. Arwab, et  kui kõik pakla oles läbi otsitu, sis wast oles kül 1 Leisiku linno saanu.

Peeter Künnapuu tunnistas, et temä om man olnu kui neid paklid om liina wiidu ja om esi ka tõise koorma paklid wiinu, kuna sis herra esi ollew pakkalde sisest linna kolkme wälja wõtnu ja üttelnu: Kae nii omma mo walitseja, siin omma poole lina pakkalde sisen. Hindrik Ajo ei ollew mitte herräle linno näüdanu, ei ollew ka herräle ütelnu, et paklide sisen 10 Leisikut linno om; nemä ollew kül esi katekeste tee pääl Hindrik Ajoga kõnelnu, et kui nee pakla otsi kõik läbi sis saap siit hulga linno. Temä ollew Hindrik Ajo pääle ilma-süüta tühja juttu tõstnu ja seda asja, mis mõisawalitseja kaiwanu mõisawalitsejale kõnelnu.

Kohtun käüjä lepsewa ütstõisega ärä.