Nr 63 Kahkwa Kr. kohtu een sel 19. December 1866

Kaiwas Jaan Puksand, et temmal om enne Niggola päiwa haina kuhhi ärra lahhutu, mes Peter Kartman ja Jaan Mit olles ütelnu, et Daniel Lepland olles ööse hainu toonu ent nemma ei tija kost temma olles toonu. Ja nüüd om J. Puksand Kahkwa wörmöldre Peep Lepmanniga Daniel Leplandi poolt hainu leidnu, mes J. Puksand arwab oma hainuga kokku sündiwat ja kohtu een ka wõtta olli sel 2. Januaril 1867.

Tunistaja Jaan Mit ütles, D. Lepland om pääle Niggola päiwa ööse hainu toonu, Peter Kartman om wäljast seisse tullu, ja ütelnu Jaanile, minne kaema Daniel tõi hainu, ent Jaan ei olle kaema lännu.

Ette tulli Daniel Lepland, ja ütel et temma wennemaalt Rõsna küllast Wassila käest ne haina oma toonu, mis Jaan Puksandi hainuga kokko sündiwa, ja enne tuud ütel Daniel Märastu lohhust ne haina ollewat. Sel 23 Januaril 1867.

Sel pääle sai kohtumees Jakab Lepland Daniel Leplandika Rõsna külla Wassila poole sadetust, kullema kas Daniel säält hainu ostnu olli, mes ka sääl olli üteltu et Daniel olles säält hainu ostnu. Ja kohtumees om Rõsnast haina üten wõtnu prowis kas neide hainuga kokku sünniwa mes Danieli poolt olli leidu, end ne Rõsna külla haina es süni mitte kokko neide hainuga mes Daniele poolt leitu olli, ja J. Puksandi haina kokku sündiwa.

Tunistaja Peter Kõrtman ütel, et Daniel om eddimalt pikki hainu toonu ja perrast paari näddali eest om jälle Daniel hainu toonu ja mõllemba korra om ööse kikka aigu ollu. Mes ka Jaan Mit perrast üttel et D. Lepland kaits kõrda hainu toonu olli mes temma ei olle tahdnu edimalt ütelda.

Se pääle ütel ka Daniel et temma kaits kõrd Rõsnast hainu toonu, mes temma enne mitte es olle üttelnu.

Kohhus mõist et D. Leplandi tunnistus mitte kokku es sünni, eddimalt üttel Märastu lohhust ja perrast Wenne maalt om toonu. Se paali ka kohtumees wennemaal sedda asja kulleman käis ja ka prowi ütten tõi mes ka neide kottust leitu hainuga kokku es sünni. Ja sis jälle ütel et temma kaits kõrda wennemaalt hainu toonu mes ka D. Lepland eddimalt ülles es anna.

Mõis kohus D. Leplandi südlasses ja peab Jaan Puksandile 5 Rbl. masma kahju tasumisesses ja tärmin panti et 26 Januarini peab käes ollema.

Walla wannemb Paap Lepman

Päkohtumees Michel Musting

Rein Oinberg