Ette tulli Jakob Kerra ja kaibas et Andri Uggur ollewat tedda ilma asjanda temma krami wälja pillanu nink mõllemba naisega tedda pesnud. Se tülli ollewat nida tulnu et Jakob Kerra päiwiline köütnü linno tarren lawwa pääl sis tulnu Andre Uggur tarre üttelnu et ütle kas olle minna warras, wõtnu linna lawwa päält wissanu mahha nink nakkanu mõllemba naisega pesma mõssu tõlwaga nink neide lina köütmise pulkega nink naine pandnu tarre usse usse kinni et ka tõiset abbis ei olle sanu tulema nink annap tunnistajas Johann Keel.

Andre Uggur kaibas ka Jakob Kerra päle et Jakob Kerra tulnu koddo lännu kambrede linno köütma nink temma tulnu tarre üttelnu ommale naisele et pane söök lawwa päle nink ütli ka Jakob Kerrale et wõtke lina ärra lawwa päält et söök pandas lawwa päle nink selle päle üttel Jakob Kerra et sinna wii parremb omma säng ja latse häll rehhe alla kui et minna omma linna ärra wõtta lawwa päält nink sis haard Jakob Kerra minno kurgust kinni ja leje minnole otsa päle nink tõugas minno nulga ja pessis nulgan minno pääd saina wasta nink sis lätsi minna kambrest tarre nink tarren pessis temma minno kõrwu möda ja tulli rindu päle nink pessis ika ka minno pääd põrmandut wastu nink sis lassis Kerra minno wallale ja minna lassi tedda wallale nink minna arwa et neil mõllembal Johann Keelega nõu kokku peetü minno pessä.

Jakob Kerra ütles et Andre Uggur tulli tarre ja olli kirwes käess nink om lubbanu minno kirwega lüwwä ja woip sedda tunnistada Mili Sarri.

Johann Keel tunnistas et minna köudi sääl kambren lawwa pääl linno nink sis tulli jo päiwal Andre Uggur ja ütles minnole et se om minno maja minna pillu teid wälja nink Jakob Kerra tulli õddangu ilda koddo ja iste kambren nink Andre Uggur tulli ka kambrede ja panni kirwe saina werde mahha nink ütles et Jakob ütle kas olle minna warras ja Jakob ütles et kas minna sedda tija nink Andre Uggur nakkas neid linno säält lawwa päält mahha kiskma nink Jakob Kerra jälle neid linno ülles otsma sis wõttis Andre Uggur mõssu tõlwa nink leije Jakob Kerrale pähhe nink minna joosi kambrest wälja ja jäijewa Jakob Kerra, Andre Uggur ja naine kambrede nink tännitawe ent minna pelgsi ja paggesi kambrest wälja.

Tohtri tunnistus om et Andre Ugguri käe warret ja ola pääl werritset jälet omma olnu. Andre Uggur anna ka Jaan Ramp tunnistajas.

Otsus:

Tunnistaja tõises kohtupäiwas ette kutsuda.

Pääkohtumees A. Wähhi [allkiri]

Kohtumees K. Lõhmus [allkiri]

Kohtumees Peter Kallman [allkiri]

Kirjotaja Jõggewa